Këtë të dielë Anxhela Peristeri ishte e ftuar speciale në emisionin “E Diell” në “Top Channel”. Këngëtarja e njohur ka folur gjatë për jetën private, fillimet e karrierës dhe ka zbuluar disa detaje të panjohura nga personaliteti i saj.
Anxhela ka treguar se është shumë supersticioze dhe beson në besëtytni, ndaj miqtë marrin shpesh këshilla prej saj. Ajo ka rrëfyer edhe një histori shumë qesharake me një nga miqtë dhe kolegun e saj të njohur, Aurel Thëllimi. Peristeri tha se kishte dëgjuar se gjethja e dafinës sjell fat dhe të shton të ardhurat, ndaj i kishte sugjeruar Aurelit të mbante një të tillë në portofol.
Pas kësaj dy këngëtarët ishin përballur me një situatë paksa të sikletshme në aeroport. Ajo ka treguar se policët i kishin kërkuar Thellimit t’i kontrollonin çantën dhe aty kishin gjetur gjethen e dafinës dhe një zhivë në portofol. Anxhela më tej vijoi duke rrëfyer se sa të vështirë e kishin pasur t’ju tregonin policëve se çfarë domethënie kishin gjethja e dafinës dhe zhiva që mbaheshin në portofol. Kjo histori shkaktoi shumë të qeshur në studio, por me siguri edhe tek personat nga ekrani që mund të jenë supersticioz njësoj si këngëtarja.
Gjithashtu gjatë intervistës Anxhela ka zbuluar se në vitet 2000 ka punuar edhe si spikere për t’u bërë sa më shpejt pjesë e botës së artit dhe televizionit. Sot Anxhela është një ndër këngëtaret e preferuara të publikut shqiptar dhe ajo është pëlqyer gjithmonë për sinqeritetin dhe energjinë pozitive që transmeton. /revistawho.com
