Seven Saraqi është rikthyer së fundmi në Amerikë për të krijuar muzikë të re pas disa vitesh rikthim në vendlindje dhe bashkëpunimi me disa artistë shqiptarë.
Ditën e djeshme ai ka publikuar këngën më të re që mban emrin ‘Nothing Changed’, pjesë e së ciliës janë një sërë sekuencash nga periudha më e vështirë që ka kaluar Kosova, ajo e luftës. Me një dedikim për vendlindjen, ai ka shpjeguar gjithçka fshihet pas kësaj kënge.
“Unë kam lindur në Kosovë dhe jam rritur në New York. Në 1996-ën familja ime u detyrua që të largohej nga shtëpia si pasojë e politikave që po shkatërronin shtetin. Kam parë shtëpinë të shkrumbohej. Kemi humbur gjithçka, miqtë, komshinjtë dhe familjen. Erdhëm në Amerikë pa asgjë tjetër përveç disa rrobave të futura në një çantë shpine dhe disa gjërave të tjera që arritëm t’i shpëtonim nga shtëpia. Fakti që u rrita në New York ka qenë një bekim. Në një qytet kaq ndryshe, me kaq shumë kultura, nuk mund të mos përfshihesha me rrymën. Unë kam lindur shqiptar, por New York-u më ka bërë njeriun që jam sot. Dua të falënderoj të gjithë fansat që kanë qenë me mua në këtë rrugëtim muzikor, prindërit e mi, historia muzikore e pasur e të cilëve ka rrethuar gjithë jetën time dhe më ka lejuar të kem zërin tim. Faleminderit. Çdo gjë që bëj e bëj për ju dhe uroj që një ditë t’jua shpërblej për çdo mundësi që më keni dhënë. Ndërsa për vendlindjen time, do ju tregoj të gjithëve, çfarë mund të bëjë një i ri refugjat nga Kosova në këtë vorbull të madhe jete. Faleminderit të gjithëve ju që më keni shoqëruar në këtë udhëtim”,-shkruan Seven Saraqi.
https://www.instagram.com/p/BzWCUtPnH7G/
Siç duket hapi i parë drejt tregut muzikor amerikan është hedhur dhe reperi i ka qëllimet e qarta për të ardhmen. Duket se projekte të reja po vijnë. / revistawho.com
