Këngëtarja e njohur me origjinë shqiptare, Dua Lipa, bëri të mundur që Miley Cyrus të performojë në festivalin e ‘Sunny Hill’ që do të mbahet në Kosovë nga dita e sotme deri ditën e dielë. Përveç këtij fakti, e pyetur ditën e sotme gjatë konferencës të mbajtur për shtyp, nëse do të ketë një bashkëpunim me këngëtaren e huaj, Lipa nuk hezitoi të përgjigjet duke pohuar lajmin.
“Ka gjasa që unë dhe Miley të bëjmë diçka”, u përgjigj Dua përballë gazetarëve, duke i bërë fansat më shumë kureshtarë se çfarë projekti muzikor mund të sjellin bashkë dy bukuroshet. Ndërsa e pyetur se pse nuk ka publikuar një këngë apo album të ri këtë vit, Lipa ka treguar se ka dashur të sjellë diçka ndryshe nga më parë.
“Për mua ka qenë e rëndësishme që të vij me muzikë të re, pak më të shkëputur nga albumi i parë. Albumi i radhës do jetë pak më ndryshe. Jam shumë krenare me punën që kemi bërë dhe shpresoj që dhe ju të jeni krenar”, u shpreh artistja 23-vjeçare gjatë konferencës për shtyp.
Kujtojmë se së fundmi Dua ka qenë në qendër të vëmendjes nga mediat e huaja për shkak të raportit të saj të ri në jetën private, me vëllain e modeleve Bella & Gigi Hadid./revistawho.com
