Pak javë më parë Roza Lati nisi transmetimin e emisionit veror “Bukë me vete” në ekranin e “Ora News”. Puna në terren nuk është aspak e lehtë dhe së fundmi Rozës e stafit të saj ju është dashur të përballen me një situatë aspak të këndshme. Sot moderatorja ka zbuluar se mbrëmjen e djeshme një person i paidentifikuar ka kërcënuar dhe goditur me pistoletë një nga aktorët e emisionit të saj. Lati nuk ka preferuar ta mbajë të fshehtë këtë ngjarje, por ka ndarë çdo detaj me ndjekësit në rrjete sociale.
Ajo ka treguar se një zotëri pranë një lokali ju ka kërkuar të ecnin ngadalë me makinë, ndërkohë që në të vërtetë Roza dhe stafi i saj po kalonin me shpejtësi minimale. Më pas aktori Enea Arapi ka rrëfyer se personi në fjalë e ka goditur në faqe me tytën e pistoletës dhe është larguar në drejtim të pedonales në Ksamil. Roza ka publikuar video nga momenti i mbërritjes së policisë dhe ju ka kërkuar falje të gjithë atyre që kanë qenë të pranishëm në ngjarje.
Gjithashtu moderatorja ka paralajmëruar pushuesit që të bëjnë kujdes në Ksamil nga personat e armatosur.
Pritet që të mërkurën e javës së ardhshme të transmetohet puntata e radhës e “Bukë me vete” dhe do të shohim nëse Roza dhe stafi i saj do të kenë mundur ta zgjidhin këtë çështje. /revistawho.com
