Vajza e Harrison Ford vuan nga epilepsia, aktori: Ajo është heroina ime

Ylli i kinemasë Harrison Ford ka rrëfyer për herë të parë mbi betejën e së bijës Georgia, 25 vjeçe, kundër epilepsisë. “Të shohësh një njeri të dashur duke vuajtur është shkatërruese, por unë e admiroj këmbënguljen, talentin dhe forcën e saj”, ka thënë aktori. I prekur, 73-vjeçari foli për luftën që e bija ka me sëmundjen e rëndë. “Admiroj shumë gjëra tek vajza ime. Ajo është heroina ime. E dua”, ka deklaruar artisti i shumë filmave në eventin e bamirësisë “FACES”, një organizatë që kujdeset për mbledhjen e fondeve për të gjetur një kurë kundër kësaj sëmundjeje. Aktori Harrison Ford baba i katër fëmijëve, tregon se Georgia e pati krizën e saj të parë në fëmijëri përgjatë një feste me pizhama. Asokohe mjekët i dhanë vetëm një kurë. Mirëpo dy vjet më vonë, e bija pati krizën tjetër. “Ishte në plazh në Malibu. Atëherë mendova, jemi në Los Angeles dhe këtu janë doktorët më të mirë të botës, duhet ta kuptojnë çfarë nuk shkon me të. Por sërish nuk u diagnostikua me epilepsi. Pas krizës së tretë në New York thanë se vuan nga epilepsia. Tani që merr kurën e duhur dhe ndjek terapinë e duhur, nuk e kanë kapur më krizat prej 8 vjetësh”, ka shpjeguar ylli i “Star Wars”. Georgia ka lindur nga martesa e dytë e aktorit me Melissa Mathison.