Aktivistja 16-vjeçare e mjedisit, suedezja Greta Thunberg ka mbërritur në New York pas një udhëtimi 15-ditor nëpër Atlantik me një jaht ekologjik që emeton zero karbon në natyrë. Qëllimi i këtij udhëtimi ka qenë ndërgjegjësimi i njerëze ndaj ndryshimeve klimatike.
Pasi Greta Thunberg mbërriti në ishullin Coney të mërkurën në mëngjes, ajo ka nisur shëtitjet në qytet.
Greta pritej të arrinte më shpejt, por detet e trazuara kanë ngadalësuar lundrimin e saj me anije. Ajo ka dokumentuar çdo moment të këtij udhëtimi prej 4800 km, duke publikuar foto në rrjetet sociale.
Në një konferencë për shtyp, Greta u bëri thirrje njerëzve të bëhen bashkë për të frenuar më tej ndryshimet klimatike.
“Ne duhet të bëhemi bashkë dhe të veprojmë, sepse ndryshe do të jetë shumë vonë. Mos të presim më, por të veprojmë tani”, tha vajza adoleshente, e cila mori gjithë duartrokitjet e njerëzve.
Kur Greta u pyet nëse mund ta bënte presidentin amerikan Donald Trump të dëgjonte, ajo u përgjigj me një “jo” të thjeshtë. “Unë nuk jam aq e veçantë. Nuk mund t`i bind të gjithë”, është shprehur ajo. “Unë thjesht do të bëj atë që duhet, për të pasur më shumë ndikim”, ka thënë 16-vjeçarja.
Greta është diagnostikuar me Asperger, një formë e autizmit, të cilën ajo është shprehur se i lejon të shohë gjërat ndryshe. “Nëse do të isha si gjithë të tjerë, nuk do ta kisha filluar këtë protestë”.
Greta do të jetë e pranishme në samitin e klimës së Kombeve të Bashkuara më 23 shtator dhe në konferencën për klimin COP25 në Kili gjatë muajit dhjetor. Ajo gjithshtu është nominuar për çmimin Nobel për Paqe në fillim të këtij viti./revistawho.com
