Këngëtarja me origjinë shqiptare, Rita Ora ka vizituar Kosovën gjatë muajit prill të këtij viti në bashkëpunim me UNICEF. Tashmë Rita është ambasadorja e Kosovës dhe po përgatit programe për përkrahje të fëmijëve e familjeve të varfëra. Tashmë është publikuar një video e vizitës së Ritës në vendlindje, bashkë me mesazhin që ajo përcjell. Kjo video u publikua në kuadër të 30 vjetorit të Konventës Ndërkombëtare për të Drejtat e Fëmijëve. Rita ka bërë një deklaratë në lidhje me vizitën e saj në Kosovë. “Ndihem e prekur dhe e frymëzuar duke punuar me UNICEF-in dhe duke takuar fëmijë e familje këtu në Kosovë, ku jam lindur. Duket sikur shumëçka ka ndryshuar këtu që nga fëmijëria ime. Kur isha një vjeç, familja ime u largua nga shtëpia për shkak të konfliktit, në kërkim të sigurisë dhe mundësive për të ardhmen. Sot Kosova është në paqe dhe shumë fëmijë kanë qasje në kujdes cilësor shëndetësor, vijojnë shkollën dhe kanë mundësi që zëri i tyre të dëgjohet. Viti 2019 është një vit i rëndësishëm për fëmijët anembanë botës. Ky vit shënon 30 vite që nga premtimi i bërë nga udhëheqësit botëror për t’i mbrojtur të drejtat e fëmijëve përmes Konventës së OKB-së për të Drejtat e Fëmijëve. Teksa shikojmë progresin që është arritur deri më tash për fëmijët, është po ashtu e rëndësishme ta pranojmë se shumë vajza dhe djem këtu në Kosovë dhe në mbarë botën janë lënë jashtë. Këtë vit unë i bashkohem UNICEF-it për t’iu bërë thirrje udhëheqësve që ta forcojnë përkushtimin e tyre për t’i mbrojtur të drejtat e të gjithë fëmijëve. Për çdo fëmijë, çdo e drejtë”, ka thënë Rita. Kjo nuk është iniciativa e parë e saj në ndihmë të Kosovës, pasi dhe paratë e fituara nga koleksioni i saj i fundit u dhuruan për bamirësi për atë vend.
https://www.facebook.com/UNICEFKosovoprogramme/videos/488024361778911/?t=5
