“Sigurisht që dua që Justin ta dëgjojë”, Selena flet për këngën e re dedikuar ish-it të saj

Dramat mes Selena Gomez, Justin Bieber dhe Hailey Baldwin duket se ende nuk kanë mbaruar. Çifti u martuan një muaj më parë dhe Selena publikoi këngën që mendohet se është dedikim ndaj Justin vetëm 3 ditë më parë. Dyshimet kanë nisur që para publikimit të “Lose you to love me”, e u konfirmua më vonë nga të gjithë ata që e dëgjuan. Por a ka dashur Selena që ky mesazh t’i përcillet Justin-it? Për këtë ajo ka folur në intervistën e zhvilluar gjatë programit të “Zach Sang Show”. “E gjithë ideja qëndron këtu: Të jesh i aftë të thuash diçka tënden dhe ta thuash atë në mënyrën më të bukur. Qëllimet e mia nuk kanë qenë kurrë të këqija. Unë as nuk e di si ta bëj atë gjë. Qëllimet mund të jenë pak të çmendura por unë dua të bëj gjithmonë diçka të veçantë, dhe kur e ndjej se disa gjëra nuk janë thënë, atëherë i kthej ato në art. Sigurisht që dua që ai ta dëgjojë këtë këngë. Më e rëndësishme për mua është që ta dëgjojë gjithë bota dhe të gjejnë veten aty, por, po, dua ta dëgjojë dhe ai”, shprehet Selena. Publikimi i dy këngëve të saj të fundit ka krijuar shumë debate dhe diskutime, e pritet gjithashtu reagimi më i rëndësishëm, ai i Justin Bieber.