Mbrëmjen e djeshme Robert Berisha ishte një nga të ftuarit special në emisionin “Glamour Zone”. Në intervistën përballë moderatores Ester Bylyku, Roberti zbuloi shumë detaje nga jeta e tij private, mbi të gjitha për ndarjen e shumëpërfolur me Nora Istrefin. Këngëtari tha se ai nuk ka thënë asnjëherë se është ndarë nga Nora, pasi ata nuk janë divorcuar ende zyrtarisht. Më pas Roberti tregoi edhe njëherë se ata janë në një pauzë e se mund të ketë një rikthim mes tyre. “Divorc me gjyq, me dokumenta nuk kemi bërë, sepse ne nuk jemi nga ato çifte që i bëjnë gjërat me inat. Çfarë shkruhet në portale nuk është e vërtetë, e vërteta qëndron diku tjetër. Është shumë personale. Besoj se mund të ketë një derë për rikthim. Të shohim, pauzat janë shumë të mira, sepse shikon ku je, ku s’je”, ka thënë Roberti.
Ai ka treguar se vazhdon të jetojë me Norën dhe Reneen, por jo gjithmonë sepse ka dhe një shtëpi të tijën pranë tyre. Roberti ka shtuar se kjo situatë nuk ka ndikuar aspak në kohën që ai dhe Nora kalojnë me vajzën, pasi vazhdojnë të jenë të përkushtuar njësoj ndaj saj. Këngëtari zbuloi se gjatë ditës kalon ai më shumë kohë me Renee-n, pasi Istrefi është e angazhuar me punët në studio dhe palestrën. Në fund kur iu desh të thoshte tre fjalë për Norën ai u shpreh: “Dashuri, respekt, shëndet”. Kujtojmë se çifti i njohur i showbiz-it i dhanë fund marrëdhënies së tyre 5 vite pas martesës. /revistawho.com
