Mbrëmjen e djeshme u mbajt premiera e filmit ‘Falco’, i cili nisi dhe transmetimin në të gjitha kinematë. Në premierën e tij ishin të pranishëm të gjithë familjarët, miqtë dhe kolegët e Bes Kallakut, për ta mbështetur në prodhimin e parë filmik të tij.
Ashtu si e do zakoni, para transmetimit të filmit, Besi mbajti një fjalim për të falenderuar këdo që ka punuar me të dhe mbi të gjitha njerëzit e tij të afërt. Si fillim aktori i humorit tregoi se nga karriera e tij në ‘Portokalli’ ka mësuar se publiku duhet të marrë një mesazh edhe në një numër 5 minutësh dhe prandaj në filimin e tij që zgjat më shumë se 1 orë ka mesazhe të forta për shoqërinë shqiptare. Përpara se të falenderonte familjen dhe kolegët me të cilët bashkëpunoi për ‘Falco’, Besi i dedikoi disa fjalë partneres së tij, Xhensila Myrtezaj.
“Nëse unë hedh hapin e parë për diçka, ajo është hapi im i dytë që më jep sigurinë dhe mbështetjen se nuk jam i vetëm në gjithë ëndrrat e mia dhe qëllimin tim. Dhe pa ndonjë qëllim ëndrrat ngelen thjesht ëndrra. Kështu që Xhensila faleminderit shumë që je pjesë e çdo ditë të timen”, tha Besi për partneren, e cila nuk mund të mungonte në ditën më të rëndësishme të tij. Në fund aktori u shpreh se i ka shumë borxh vajzës së tij, Ajkës, sepse për shkak të filmit ka humbur 5 muaj kohë, të cilën nuk mundet ta rikuperojë. Filmi ‘Falco’ godet fortë realitetin social-politik të vendit, sepse në qendër të tij është historia e Skifterit, i cili një ditë heq rrobat e hajdutit dhe vesh kostumin zyrtar për t’u bërë deputet. /revistawho.com
