Ditën e sotme bëhen 3 vite nga koha kur Ergi Dini ndërroi jetë në mënyrë tragjike pas një aksidenti me motor. Vitet që kalojnë nuk munden ta lehtësojnë dhimbjen për familjarët e këngëtarit të ndjerë, të cilët e kujtojnë çdo ditë. Sot babai i tij, Dashamir Dini, i ka kushtuar një poezi shumë prekëse, për të shprehur gjithë mallin për të birin.
Babai i Ergit ka treguar gjithmonë përmes vargjeve sa e rëndë ka qenë kjo ngjarje për familjen e tij dhe sa shumë ata e ndjejnë mungesën e Ergit. I ftuar para pak javësh në emisionin “Rudina”, Dashamir Dini tregoi se që nga ndarja nga jeta e të birit nuk shkruan më poezi, përveçse në kujtim të ditëlindjes së Ergit dhe të kësaj dite të dhimbshme. “Unë kam shkruar shumë poezi, por që nga ikja e tij nuk kam shkruar më poezi vetëm prej Ergit. Shkruaj vetëm një herë në vit për ditëlindjen e tij ose momentin e ndarjes. Është e njëjta gjë që më frymëzon, në kuptimin e asaj që të shkarkoj diçka dhe të mbaj marrëdhënien me të”, është shprehur babai i artistit të ndjerë gjatë emisionit. Kujtojmë se dhe Barbana Dini i emocionoi të gjithë para 1 muaji, kur publikoi këngën “Ku je” të cilën Ergi e kishte lënë përgjysmë. /revistawho.com
