‘Festivali i 58-të i Këngës’ për këtë vit ka rezervuar surpriza të shumta, të cilat po zbulohen pak nga pak të gjitha. Para pak ditësh Alketa Vejsiu tregoi se do të këndojë në festival këngën “E duam lumturinë” të Parashqevi Simakut. Ajo publikoi në rrjete sociale video në të cilat shihej duke punuar së bashku me Shpëtim Saraçin për ta sjellë këngën në formën më të mirë. Por kjo është vetëm një nga surprizat, pasi Alketa Vejsiu dhe Vera Grabocka do të sigurohen që në tre netët e festivalit të dhurojnë një spektakël të vërtetë. Së fundmi burime për ‘News31’ kanë zbuluar se në një nga netët gjysmëfinale do të vijë si e ftuar speciale këngëtarja me origjinë shqiptare, Eleni Foureira.
Eleni ka kënduar edhe më parë në Shqipëri, por është hera e parë që ngjitet në skenën e një prej festivaleve më të rëndësishëm në vend. Eleni Foureira me siguri do t’ju japë fat të gjithë artistëve shqiptarë që do të konkurrojnë në ‘Festivalin e Këngës’, sepse ajo është ngjitur më parë në skenën e ‘Eurovision’, ku zuri vendin e dytë si përfaqësuese e Qipros. /revistawho.com
