Pavarësisht se Shqipëria po jeton ditët më të vështira, Ardit Gjebrea ka vendosur të mos e anulojë “Kënga Magjike”. Ditën e djeshme drejtuesi i festivalit tregoi se këtë vit do ishte në qendër kauza “Këndoj për të ndërtuar”, sepse çdo biletë e shitur do të shkojë në ndërtimin e shtëpisë së një familjeje të prekur nga tërmeti. Arditi e zbuloi këtë gjë pasi Besa Kokëdhima deklaroi se do të tërhiqej nga festivali për shkak të gjendjes së ngarkuar emocionale dhe ai i kërkoi të mos e bënte këtë gjë për të çuar deri në fund misionin e tyre. Tashmë duket se të gjithë artistët e kanë mbështetur këtë ide dhe kanë nisur provat për festivalin. “Kënga Magjike” do të mbahet në data 5-7 dhjetor në “Pallatin e Kongreseve”, ndaj për të mos humbur kohë këngëtarët kanë nisur provat. Këtë gjë e ka treguar Venera Lumani që ka postuar një video të partnerit të saj, Lind Islami, duke kënduar. Këtë vit Lindi konkuron me këngën “Ti m’ke rrit”, e cila e emocionon shumë Venerën. “Asnjëherë nuk munda ta dëgjoj, e mos të qaj, nan’. Lind Islami, Zoti të bekoftë zemër”, ka shkruar Venera përkrah videos së publikuar.
Këtë këngë Lind Islami ja ka dedikuar nënës së tij, por të gjithë e kanë pëlqyer e përqafuar menjëherë pasi kanë gjetur veten në të. /revistawho.com
