Adrola Dushi ishte e përzgjedhura e Ardit Gjebreas për ta shoqëruar në moderimin e festivalit ‘Kënga Magjike’ për këtë vit. Për tre netë me radhë Adrola provoi emocionet që të jep një skenë e madhe, siç është ajo e ‘Pallatit të Kongreseve’. Pavarësisht se nuk kishte pasur asnjëherë eksperiencë në moderimin e spektakleve të mëdha, Adrola ja doli mbanë më së miri, edhe falë mbështetjes e ndihmës së Arditit. Për këtë arsye modelja e ka falenderuar publikisht moderatorin e njohur për mundësinë e madhe që i dha për t’u përfshirë në ‘Kënga Magjike’. Adrola ka publikuar në ‘Instagram’ tre foto me Arditin të realizuara gjatë netëve të festivalit dhe i ka kushtuar disa fjalë. “Mirënjohje pafund për kujdesin dhe dashamirësinë që ke treguar ndaj meje. Faleninderit që më dhe mundësinë të jem pjesë e magjisë tënde!”, ka shkruar Adrola në postimin e saj.
https://www.instagram.com/p/B55mINjBiyR/?igshid=137b3ed0kglad
Menjëherë pas publikimit nuk ka munguar një përgjigje nga Arditi, që është shprehur: “Ti magjinë e ke në zemër”. Adrola Dushi pati dhe mbështetjen e gjithë personave të afërt gjatë prezantimit të ‘Kënga Magjike’, sidmos të mikes së saj, Xhesika Berberi, që i qëndroi pranë në çdo moment. /revistawho.com
