A do të ketë ndonjë bashkëpunim mes motrave Ismaili? Ja si përgjigjet Adelina

Adelina Ismaili ka disa kohë që nuk është shumë aktive në muzikë, duke sjellë më tepër bashkëpunime me artistë të rinj. Para pak kohësh ajo solli një këngë me Rina Balaj dhe së shpejti pritet të publikohet bashkëpunimi i saj me reperin Skerdi. ‘Prive’ ka zbuluar se ata do të sjellin një ripunim të këngës ‘Amanet’ të Adelinës, të cilën këngëtarja e ka shumë përzemër. Në një intervistë për ‘Prive’, këngëtarja ka treguar se ajo ka kohë që nuk bën muzikë për biznes, por vetëm për kënaqësinë e saj. “Unë jam mysafire e Skerdit këtu dhe me kënaqësinë më të madhe. Nuk mund të thuhet se po bëj muzikë të madhe 1 herë në vit. Tashmë po e bëj vetëm për qejf, për një dashuri të vërtetë. Muzika nuk është as mjet ekzistence, as mjet mbijetese, as diçka që po më imponohet”, ka thënë Adelina. E pyetur nëse do të ketë ndonjë bashkëpunim mes saj dhe të motrës, Zanfinës, këngëtarja ka treguar se nuk e kanë menduar këtë gjë. “Nuk e kemi menduar një gjë të tillë. Ka marrë jeta një drejtim tjetër. Edhe Zanfina ka marrë një drejtim komplet tjetër, prandaj mbase duhet të flisni edhe me të”, është shprehur Ismaili. Dy motrat e njohura kanë bashkëpunuar disa herë bashkë, madje edhe me artistë të tjerë, por duket se kjo gjë nuk është më pjesë e planeve të tyre. /revistawho.com