“Makinë me dy timonë” programi i njohur radiofonik, që ka si protagonist gazetarin dhe autorin, Enkel Demi duket se do të vijë i riformatuar në fillim të 2020-tës.
Enkel Demi këtë sezon të ri do të jetë në bashkëprezantim me një tjetër kolege gazetare dhe ajo është, Suada Daci.
Të dy drejtojnë emisione mëngjesi, në televizione informative – Keli në “Abc News”, ndërsa Suada emisionin “Rreze Dielli” në Report Tv, por mesa duket “Makinë me dy timonë” do t’i bëjë bashkë në orarin e pasdites.
Ka qenë Suada Daci ajo që ka bërë publik lajmin në profilin e saj në Instagram, duke u shprehur e lumtur për rikthimin e saj në radion “Club Fm”, ku një vit më parë drejtonte “Klubin e Mëngjesit”, krah Flori Gjinit dhe Rudi Dedës.
Programin “Makinë me dy timonë” Enkel Demi e ka prezantuar fillimisht me skenaristin, Edi Oga dhe më pas me gazetaren Zhaklina Gjolla. Ne nuk na mbetet gjë tjetër veçse t’i urojmë Kelit dhe Suadës, emision të mbarë në 2020-tën!
