Koha që jetojmë i jep të drejtën çdokujt që ka një ‘Instagram’ me më shumë se 10 mijë ndjekës, të komentojë e gjykojë personazhe të njohur të jetës publike dhe të kthehet kështu në lajm. Pak rëndësi ka statusi që ka në shoqëri, apo se kë cënon. Ai/ajo po prodhon një lajm, që përkthehet në ushqim për mediat online, të cilat (përfshirë edhe ne) vdesin për tituj që kanë brenda ironi, sharje, sherr… Lajmi bëhet edhe më interesant kur në histori përfshihen individë që janë bërë të njohur prej raportit që kanë pasur me personazhin publik. Që të mos ju lodhim me teori, historia e fundit që na shtyu të shkruajmë këtë artikull është ajo e ish-mikeshës së Jonida Maliqit, e cila inatet personale me ish-shoqen vendosi për të disatën herë t’i shfryjë në publik, në një profil që numëron më shumë se 20 mijë ndjekës, për të thënë që sipas saj Jonida nuk merr vesh nga moda, që ajo ka borxhe, e të tjera si këto…
Tani edhe nëse vetë Karl Lagerfeld do ngrihej sot nga varri dhe do të na thonte që Jonida nuk merr vesh nga moda – ne nuk do ta besonim… Në më shumë se 2 dekada karrierë, ajo është artistja e vetme që nuk është kontestuar asnjëherë për shijen në të veshur, ndaj edhe ka marrë titullin e ikonës së parë të modës, nga mediat dhe të gjithë ata që konsumojnë media.
Këtë punën e borxheve e besojmë më pak, duke pasur parasysh historinë e Jonidës në biznesin e modës në Tiranë, por edhe zgjidhja ligjore që ka vendosur t’i bëjë situatës tregon që faktet janë në favor të saj. Jonida ka qëndruar e heshtur deri më sot kur sqaroi se do t’i zgjidhë gjërat në mënyrë ligjore. Ajo e ka zbuluar vetë sot këtë gjë, në ‘Instagram-in” e saj personal. “Përshëndetje të gjithëve, faleminderit për suportin. Në fakt nuk ka qenë aspak e lehtë pasi të gjithë këto situata vijnë nga njerëz që ke ngrënë bukë, i ke futur në shtëpi, por fatkeqësisht ka dhe të tillë. Megjithatë nuk i kam borxh askujt dhe çështjen po e çoj në mënyrë zyrtare dhe ligjore sepse kam prova që nuk i kam borxh askujt në jetë dhe krahas kësaj nuk mallkoj se jam nënë vetë. Nëse ke prova që të kam mallkuar ndonjëherë pse nuk i bën publike? Se ti më ke bllokuar mua, shkruan vetëm publikisht, jo personalisht. Pse ke frikë? Kam edhe unë foto, kam prova, të shkruara nga ty, e di ti”, shprehet këngëtarja e njohur.
Kujtojmë në fund se ajo që të përzien më shumë në këtë histori është që një shoqe e fëmijërisë vjell vrer për vajzën me të cilën u rrit dhe ndau kohë, derisa u rrit dhe ‘vlerësoi’ që më shumë sesa shoqëria vlen lajmi, por e harroi që në fund, ajo mbetet sërish ish-shoqja e Jonida Maliqit.
