Teksa po niseshin për në Itali, disa nga mjekët e infermierët shqiptarë i treguan kryeministrit Edi Rama se po udhëtonin pa i treguar familjaes pasi nuk donin t’i shqetësonin dhe ndoshta për të shmangur edhe faktin që frika se do të rrezikonin jetën e tyre t’i bënte prindërit të mos i jepnin “leje” me zemër e t’i mbyllnin derën. Nisur nga kjo, moderatorja italiane e emisionit “Agora” në Rai3, Serena Bortone, në një komunikim të drejtpërdrejtë me Skype nga Tirana me kryeministrin Edi Rama iu drejtua prindërve të mjekëve shqiptarë: “Rrini të qetë se do të kujdesemi për ta edhe ne. I dërgoj një mesazh prindërve të tyre. Si italian jemi popull bujar dhe i ndjeshëm”, u shpreh Serena.
Më pas biseda e tyre vazhdoi me atë çka po ndodh, ku sigurisht në fokus mbetej vendimi i kryeministrit për të ndihmuar Italinë.
“Ajo që ndodh në Evropë në përgjithësi, nuk ishte se pritej që ta nxirrte në pah ky virus, është humbje e kujtesës se pse vetë Evropa është krijuar si një hapësirë, paqeje, bashkëpunimi. Të shohësh Italinë në një situatë të tillë të bën të ndihesh keq, por nga ana tjetër jemi përballë një armiku që na ka sulmuar të gjithëve. Është shtëpia jonë e përbashkët që digjet dhe nuk mund të rrimë të gjithë të mbyllur në dhomën tonë dhe të iluzionojmë që nëse digjet një dhomë nuk do të djegë tjetrën. Njerëzit duhet të rrinë në shtëpi, por shtete nuk duhet të rrinë në shtëpi, duhet të projektojnë kundërsulmin. Nuk mund të fitohet një luftë botërore nëse shtetet nuk rrinë në shtëpi si njerëzit”, tha Rama për emisionin Agora në Rai3.
“Edi Rama lider i botës më duket se ka thënë gjërat me direkte se ato që kemi dëgjuar këto ditë”, shtoi moderatorja Bortone.
