Nga Ajn
Dita e 55 e karantinës. Për çudi, dita ime e 55 përkon me ngjarje që të lidhin me nenin e famshëm “55” të agjitacionit e propagandës me të cilin në komunizëm dënoheshin zërat kundër pushtetit e pro lirisë.
Sot 15 qytetarë janë shoqëruar në rajonin e policisë sepse kishin dalë në shesh të përkujtonin ditën e Europës.
Është e trishtë të shoqërohesh në polici ditën e Europës, kur del të përkujtosh lirinë. Është e trishtë të të ndrydhen liritë në emër të jetës. Vetë jeta e përfshin lirinë.
15 të shoqëruar në polici e 12 raste të reja me coronavirus. Nuk është më e qartë se çfarë vret më shumë.
Teatri është ende në këmbë por premtimet për shembje janë të forta. Ne jemi në demokraci por premtimet për autokraci nuk mungojnë. Ne jemi ende shëndoshë por premtimet e frika për spitale nuk mungojnë. Por spitalet janë vetëm për Covid, nuk lejohen sëmundjet e tjera.
Na duhen kishat e xhamitë, të lutemi e të falemi, të marrim bekimet e paqen, të heshtim e të duhemi, të gjejmë udhën e drejtë e ecjen e duhur, të meditojmë e të vendosim, të reflektojmë e të gjejmë dritën. E trishtë dita e lirisë së pajetuar. E trishtë pamundësia.
