Pas një periudhe të gjatë izolimi dhe mungesës së argëtimit, Bashkia Tiranë ka vendosur të festojë me muzikë mbylljen e gjendjes së jashtëzakonshme.
“MuzikëOn” quhet koncerti i cili do të mbahet pasditen e nesërme në orën 19:00 në Amfiteatrin e Tiranës duke bërë bashkë emra të njohur të muzikës shqiptare si Ronela Hajati, Marsela Çibukaj, Altin Shira, Ylli Baka, Sidrit Bejleri, Anxhela Peristeri, Çiljeta, Maya, Eneda Tarifa, Eranda Libohova, Eli Fara dhe Fifi për të dhuruar një festë prej 5 orësh me muzikë ‘live’.
Qytetarët e Tiranës nuk do të mund të blejnë një biletë për këtë koncert, pasi pjesëmarrja në të do të jetë e limituar, por me siguri do të munden ta shijojnë muzikën përgjatë gjithë rrugës së gjelbërt në liqenin artificial, ku do të ndihen dhe dëgjohen të gjitha notat muzikore.
Të tjerë do të munden ta ndjekin nëpërmjet ‘livestream’ nga shtëpia e tyre përmes Bashkisë Tiranë.
Me siguri pas këtij koncerti me shpresën e mirë se gjendja e ‘Covid-19’ do të përmirësohet, të gjithë artadashësit do të munden të shijojnë nga afër këngëtarët e tyre të preferuar në organizimet e ardhshme./revistawho.com
