E ka vjedhur apo jo Geti këngën? Ka qenë kjo pikëpyetja e këtyre ditëve, shoqëruar edhe me detaje që jepnin shifrën e beat-it, që ishte disa herë më e ulët se ajo syzeve të përdorura ngë videoklip nga lideri i “BabaStars”. Lidhur me këto akuza, ka folur sot në rrjetin social ‘instagram’, Liberian Seilimi, një nga autorët e këngës, i cili jep të vërtetën e tij mbi këngën “BS”, që vjen si bashkëpunim mes vëllait të tij dhe reperit Onat.
“‘Sample’ prodhohet për t’u përdorur që nga momenti kur del në treg. Mundet ta blejë çdo muzikant/producent në botë edhe ta përdorë në çfarëdo lloj forme. ‘Sample’ ka me mijëra lloje, mundesh ta prodhosh edhe vetë, vokal ose instrument. Sot, në 99 përqind të këngëve është e pamundur mos të kesh ndonjë ‘sample’, çfarëdo qoftë ajo, edhe një ‘hej’ ose ‘yeah’, madje të njëjtin mund ta përdorin 2, 3 ose 100 vetë. Kjo nuk do të thotë që ia ka vjedhur askush askujt, të gjithë e kanë blerë të drejtën dhe që në momentin kur BLIHET ‘SAMPLE’, GJITHÇKA ËSHTË E LIGJSHME! Sot, nuk mundesh të vjedhësh edhe të besh miliona klikime në YouTube, se në botë MBROHEN të drejtat e autorit. Ose, në të kundërt, të padit tjetri…’Vija melodike’ përfaqëson pothuajse të gjithë këngën – Është ajo që ti këndon/interpreton dhe nuk e bën askush tjetër njësoj dhe kjo nuk ka nevojë as për t’u sqaruar, mendoj. E nëse të kënduarën “vijën melodike” e bën dikush njësoj dhe nuk e ka të drejtën, kjo quhet këngë e vjedhur. Më shumë më brengos fakti që sot, në 2016-ën, është turp për gazetarët që shkruajnë për muzikë/artistë e gabojnë në terma kaq të thjeshta muzikore”, ka përfunduar ai.
