Ditën e sotme është ndarë nga jeta aktori dhe regjisori i njohur shqiptar, artisti i merituar Andon Qesari në moshën 78-vjeçare. Lajmin e ka dhënë djali i aktorit të njohur, Edon Qesari, i cili me një status në ‘Facebook’ ka lajmëruar të gjithë miqtë për humbjen e të atit.
“Të dashur miq e të njohur,
Sot në mëngjes, pas një sëmundje të gjatë, e cila e kishte rënduar dhe sfilitur shumë në vitin e fundit, i dashuri babai im ANDON QESARI u nda nga jeta në moshën 78-vjeçare.
Dashuria e Tij e pamat për ne, familjarët dhe njerëzit e tij të afërt, përpjekjet për të na dhënë një jetë me dinjitet dhe begati, pasioni i vyer artistik që e shoqëroi gjatë gjithë jetës dhe shënoi një karrierë të paharrueshme në teatrin shqiptar dhe studimin e artit, humori i hollë që e spikaste, janë trashëgimi më i çmuar që na la.
Të dua Ba’ dhe mirupafshim në një jetë më të mirë…”, ka shkruar ai.
Andon Qesari u diplomua si aktor në shkollën “Aleksandër Moisiu” në 1966 dhe më pas ka interpretuar shumë role, duke filluar nga Besniku “Shënomëni dhe mua” apo Feni “Furnalta”. Qesari ka qenë tejet i suksesshëm edhe si regjisor duke renditur kështu një sërë projektesh të drejtuara prej tij si: “Karnavalet e Korçës”, “Pallati 176”, “Nën dritat e skenës”, “Në jetë”, “Valsi i Titanikut”, etj.
Revista Who i shpreh ngushëllimet e sinqerta familjes Qesari./revistawho.com
