Pilotët e “Formula 1” darkojnë bashkë, paguajnë 17 fatura me 17 karta krediti

Megjithëse janë ndër sportistët më të paguar në botë, pilotët e “Formula 1” kur ulen në tavolinë paguajnë secili të veten. Kështu ka ndodhur edhe gjatë një darke në Shangai. 17 pilotë të “Formula 1” në fund kanë këmbëngulur të paguajnë secili porosinë përkatëse duke kërkuar posaçërisht nga një faturë. Këtë detaj komik e zbuloi për “The Guardian” Lewis Hamilton i cili vitin e kaluar ka firmosur për Mercedes një kontratë 3-vjeçare 125 milionë euro. “Ishte pak çmenduri dhe qesharake në fakt. Unë kërkova të paguaj për të gjithë por dikush tha që ta ndajmë llogarinë. Me shumë mundësi nuk ishte as dhe aq e kushtueshme. Unë propozova që të paguaja vetë, dhe herën tjetër ta bënim me radhë por m’u përgjigjën se donin të paguanin në mënyrë individuale. Të gjithë morëm nga një faturë, 17 fatura që u paguan nga 17 karta krediti të ndryshme. Ishte gjëja më qesharake që kam parë ndonjëherë”, ka treguar Hamilton.