Të ftuarit e kësaj të premteje në emisionin “Më lër të flas”, ishin Olsi Bylyku dhe Egli Tako. Dyshja ka folur për fillimet e lidhjes së tyre, duke zbuluar fakte interesante nga marrëdhënia. Teksa Olsi tha se i janë dashur 8 muaj për ta bërë Eglin për vete, kjo e fundit zbuloi se ka qenë fanse e Olsit në programin e humorit “Portokalli” në rolin e Kimikatit.
Çifti foli edhe për planet për martesë, duke shtuar se janë të rinj dhe se të dy i janë dedikuar karrierës, por dasma hyn padyshim në planet e tyre. Përballë sfidës “Sa e njohin njëri-tjetrin”, Olsi dhe Egli zbuluan disa gjëra për jetën e tyre në çift, e midis tyre se kush e bën ligjin në shtëpi. “Besoj se ligji nuk thuhet se kush e bën”, tha Olsi. Në fund të dy ngritën tabelat me fotografitë e njëri-tjetrit.
Kujtojmë se Olsi dhe Egli janë në lidhje me njëri-tjetrin prej 4 vjetësh, ndërsa janë njohur nga miku i tyre i përbashkët, këngëtari Lorenc Hasrama. Në mars të këtij viti, dyshja erdhi me bashkëpunimin e parë, “Do ditë”, këngë që numëron më shumë se 11 milionë shikime në “Youtube”. Egli publikoi këngën e saj të parë “Adios” në qershor të vitit të shkuar. Olsi nga ana tjetër numëron disa bashkëpunime mes të cilëve përmendim të fundit me këngëtarin Hazy, “Ca ca”, duke mos harruar bashkëpunimet me Lorenc Hasramën, Bes Kallakun, Petro Xhorin etj.
