Një person vdes çdo 4 sekonda në botë nga uria, thonë më shumë se 200 organizata joqeveritare që u bëjnë thirrje liderëve botërorë që nga sot, duke theksuar në New York gjatë Asamblesë së Përgjithshme të OKB-së “të veprojnë për t’i dhënë fund krizës globale të urisë”.
238 organizatat në njoftimin e tyre përkatës thonë se 345 milionë banorë në botë vuajnë nga uria akute. “Organizatat nga 75 vende nënshkruan një letër të hapur në të cilën shprehin indinjatën e tyre për shpërthimin e numrit të njerëzve që vuajnë nga uria dhe për të dhënë rekomandime, në një kohë kur 345 milionë njerëz në botë vuajnë nga uria akute, një numër që është dyfishuar që nga viti 2019. Letra e hapur u publikua me rastin e fillimit të Asamblesë së Përgjithshme vjetore të OKB-së, ku një numër i madh liderësh politikë, si dhe përfaqësues të shoqërisë civile takohen për një javë gjatë asaj që konsiderohet sesioni më i rëndësishëm diplomatik në botë. Është e papranueshme që me gjithë këtë teknologji bujqësore sot, ne ende po flasim për urinë në shekullin e 21-të,” theksohet në deklaratë.
