Një pjesë nga intervista e Cristiano Ronaldos me Piers Morgan është publikuar së fundmi. Këtë herë ai ka lënë mënjanë futbollin dhe polemikat për të folur për një nga momentet më të errëta të jetës së tij personale.
Portugezi u pyet në lidhje me vdekjen e një prej binjakëve që priste prillin e kaluar me Georginën:
“Ka qenë ndoshta momenti më i vështirë që kam pasur në jetën time që nga vdekja e babait tim. Ka qenë shumë e vështirë.
Ndonjëherë, përpiqem t’i shpjegoj familjes sime dhe miqve më të ngushtë se kurrë nuk jam ndjerë i lumtur dhe i trishtuar në të njëjtën kohë. Është e vështirë të shpjegohet. Nuk e di nëse do të qash apo do të buzëqeshësh, sepse është diçka ndaj të cilës nuk di si të reagosh. Ishte një kohë e vështirë, sepse nuk e kuptonim pse po na ndodhte kjo. Ishte momenti më i vështirë që kemi vuajtur, sidomos Gio. Ishte e vështirë. Gio erdhi në shtëpi dhe fëmijët filluan të thonë ku është foshnja tjetër, ku është foshnja tjetër, ku është foshnja tjetër?”, ka thënë ai.
