Nëse të gjithë jemi mësuar të marrim dhurata për ditën e lindjes, Angela Martini e ka menduar ndryshe këtë ditë. Modelja e njohur shqiptare i ka bërë një superdhuratë shkodranëve të saj. Një fushë sportive dhe një kënd lojërash janë dy hapësirat më të reja në Shkodrën e zemrës. “Angela Martini Foundation” kësisoj ka bërë investimin më të rëndësishëm të këtij viti për qytetin e Shkodrës. E vendosur në oborrin e shkollës “Ali Leçaj”, fusha sportive e volejbollit dhe basketbollit krijon mundësinë e stërvitjes për të rinjtë shkodranë. Fëmijët do të mund të luajnë në këndin e lojërave, aty, në Shkodrën që të pret me krahë hapur kurdoherë. Kjo nuk është hera e parë që Angela dhuron për Shqipërinë. Dhuroi një shumë të konsiderueshme 4 vjet më parë, në kohën kur tërmeti i 26 nëntorit 2019 shkatërroi disa zona, gjithashtu dhe përgjatë pandemisë, ndihmoi shumë prej familjeve në nevojë në qytetin e Shkodrës. Angela nuk i harron rrënjët, aty ku u krijua shpirti i saj, në mes të mirës që sot e nesër gëzojnë bashkëkombasit e saj.
