Pas zhurmës së shkaktuar në mediat online nga lajmi me titull “Olta e ‘Big Brother’, tundon burrin e Nora Istrefit”, vjen sot në revistawho.com reagimi i Robert Berishës. Në një komunikim përmes telefonit, Roberti sqaron se nuk e njeh fare Olta Shetën, vajzën simpatike të disa edicioneve më parë në “Big Brother”, sepse ai në të vërtetë nuk e ndjek fare këtë reality show. “Nuk e njoh fare këtë vajzën, sepse nuk e shoh ‘Big Brother’. Ajo u paraqit në prapaskenë si fanse dhe kërkoi të bënte foto me ne… Që të jem i qartë një herë e përgjithmonë me mediat, mua më tundon vetëm Nora ime” – sqaron artisti, që bashkë me Sinan Vllasaliun është i angazhuar me koncerte kudo ku ka shqiptarë. Robert Berisha dhe Nora Istrefi, janë prej një viti e gjysmë të martuar, ndonëse historia e tyre e dashurisë daton 9 vite më parë. Ata jetojnë të lumtur lidhjen e tyre, të cilën Zoti së fundmi e ka bekuar edhe me një vajzë.
