Tetori rozë është këtu. Ndërgjegjësimi ndaj kancerit të gjirit po rritet dita-ditës dhe një zë, dy, njëmijë, janë me rëndësi për mesazhe për vajzat e djemtë. Në podkastin e radhës të “Një zë me Mirën” ishte Dr. Edlira Rehovica, senologe. Mes të tjerash, ajo foli edhe për mënyrën sesi mund të shpëtojmë nga përballja kancerin e gjirit dhe sigurisht gjithçka vjen nga stadi kur zbulohet.
“Kanceri varet nga stadi kur e ke zbuluar. Sa më herët të kapet kanceri aq më e gjatë do të jetë mbijetesa. Nëse kap një tumor në fazat e para, me mjetet që ne kemi, mundësia është optimale për të mbijetuar. Kjo nuk qëndron, kanceri i gjirit di të vrasi shumë mirë, është i pabesë. Është një nga kanceret më të shprehur dhe më vdekjeprurës nëse nuk e diagnostifikon në kohë. Edhe këtu dalim prapë te rëndësia e diagnostikës në kohë. Çdo femër mbi 20 vjeç dhe për sa kohë kemi jetën dhe gjirin, duhet të kryejë kontrolle 1 herë në vit edhe pa pasur asnjë ankesë. Dhimbja është një faktor mbrojtës, sepse është ajo që të alarmon. Dhimbja e ka gjetur gjuhën e komunikimit me ne. Por, përgjithësisht formacionet tumorale nuk dhembin, ato që dhembin janë periudhat ciklike të gjirit si përshembull ardhja e periodave”, tha ajo.
