Bleona shquhet si një artiste që ka kapërcyer kufijtë lokalë, duke krijuar një karrierë të suksesshme në nivel ndërkombëtar.
Gjatë një interviste të fundit në revistën “Living” ajo tha se në një moment të karrierës së saj, ndjeu se tregu shqiptar nuk mund të përmbushte më ambiciet e saj artistike. “Fenomeni i përsëritjes është horrori më i madh për një artist,” shprehet ajo, duke treguar pse vendosi të ndiqte një rrugë të re jashtë kufijve.
Në vitin 2012, ajo riktheu për pak kohë fokusin në Shqipëri, duke organizuar një tur që sipas saj ishte “në të njëjtin nivel si çdo artist tjetër botëror. Nëse unë do të kisha qëndruar këtu, thjesht do të kisha përsëritur veten,” shprehet ajo me sinqeritet.”
Sot, në nivel global, ajo ka nënshkruar kontrata me disa nga emrat më të mëdhenj të industrisë muzikore. “Për kohën digjitale, unë prapë po bëj histori në mënyrën time,” tregon ajo, duke theksuar suksesin e bashkëpunimeve të fundit dhe impaktin e këngës “Stani” në tregun ndërkombëtar.
Duke reflektuar mbi udhëtimin e saj të vështirë në Shtetet e Bashkuara, Bleona thotë: “Unë nuk jam e lindur në Amerikë, unë flas me theks kur flas anglisht. Për Amerikën do jem gjithmonë një artiste e huaj, ndërkombëtare, e cila sjell më të mirën e kulturës së vendit nga i cili vjen.”
Kur pyetet për krahasimet me emra si Dua Lipa apo Rita Ora, ajo përgjigjet me realizëm: “Dua Lipa dhe Rita Ora i përkasin sistemit amerikan; ato janë teknikisht këngëtare britanike apo amerikane me origjinë shqiptare,” shprehet ajo. “Unë nuk kam arsye të krahasohem me to, sepse rrugëtimi ynë është tërësisht i ndryshëm. Ato nuk kanë ndenjur në radhë për bukë si të gjithë ne në vitet 90- të, nuk kanë pasur karrierë e sukses në Shqipëri dhe pastaj të kenë kaluar në skenën ndërkombëtare. Ato janë formuar atje, ndërsa unë jam rritur dhe kam filluar këtu, në Shqipëri.”
Një tjetër moment kuptimplotë për karrierën e saj ishte vendimi për të hequr këngët e vjetra nga YouTube. “Kam hequr ‘Mandarinë’ me 70 milionë shikime. Nuk ka rëndësi numri. Dua t’i sjell këngët e mia në versionin më të mirë të tyre, me standardet që kam sot.”
Mesazhi i saj për kolegët shqiptarë është i qartë dhe frymëzues: “Nëse dëshironi të promovoni muzikën tuaj jashtë vendit, unë po jua ofroj këtë mundësi. Mos harxhoni para për klikime false, por investoni në mënyrën e duhur dhe bëhuni viral në gjithë botën.”
“Nuk dua të fle me një burrë të pasur, unë jam vetë ‘burri i pasur’,” përfundon ajo, duke treguar vendosmërinë dhe pavarësinë që e kanë bërë një figurë unike dhe të pakrahasueshme./Living
