Behgjet Pacolli ka folur hapur për lidhjen e tij 7-vjeçare me këngëtaren Ana Oxa, duke e përshkruar si një marrëdhënie të veçantë dhe përmbushëse.
“Ka qenë dashuria ma e madhe. Dhe ma e kandshmja…” – shprehet ai, duke reflektuar mbi vitet e bukura dhe sfidat që çuan në ndarjen e tyre.
Pacolli tregoi se gjatë asaj kohe, Ana kishte nisur të lexonte libra meditimi, kryesisht të sekteve indiane, që nisën të ndikonin në jetën e saj. “Një ditë më tha se ishte në një takim, por në fakt ishte në një meditim. Kam shkuar pa paragjykim, por ndoshta isha i papërgatitur për atë çka pashë. Kjo gjë më pengoi,” tha ai, duke pranuar se situata u tensionua edhe më shumë kur motrat e Anës filluan të ndërhynin në jetën e çiftit.
“Ajo mbeti mes familjes së saj dhe meje,” kujton Pacolli, duke shtuar se presioni për mungesën e fëmijëve e rëndoi edhe më tej marrëdhënien. Çifti madje kishte udhëtuar deri në Amerikën e Jugut për të gjetur një zgjidhje, por presioni nga të afërmit ishte i madh.
“Ju e dini si janë gratë tona: ‘Po çfarë gruaje je ti që nuk bën një fëmijë?’ Kjo ishte arsyeja e parë që çoi në frustrim,” tha ai.
Pavarësisht ndarjes, Pacolli flet me respekt për Anën: “Ajo nuk pretendoi kurrë asgjë prej meje. U ndamë që në seancën e parë dhe pastaj u ulëm në një lokal afër, të dy duke derdhur lot.” Ai e përshkroi lidhjen e tyre si një kombinim të bukur të 4 viteve bashkëjetesë dhe 3 viteve martesë: “Ishte lodhje, përmbushje dhe shumë dashuri.”
Në fund, Pacolli përfundon me fjalët e tij prekëse: “Ishte dashuria më e madhe. Dhe më e këndshme…”
