Ikona e muzikës shqiptare, Parashqevi Simaku, është ribashkuar me djalin e saj, Luke, duke përmbushur një dëshirë që e ka mbajtur gjallë për vite me radhë.
Momenti emocionues u nda në rrjetet sociale nga Elton Ilirjani, i cili publikoi foto të artistes duke përqafuar të birin në këtë takim të shumëpritur.
Sipas Ilirjanit, ribashkimi ndodhi në praninë e ish-bashkëshortit të Simakut, Robert Nolfe.
“Zoti të bekoftë, Elton, dhe ty, Robert,” u shpreh këngëtarja me mirënjohje.
Në një moment prekës gjatë takimit, Ilirjani pyeti Luke si ndihej dhe nëse e donte nënën e tij. Ai u përgjigj: “Ndihem mirë, e dua!”
Kujtojmë se rasti i Parashqevi Simakut, e cila jetonte e pastrehë në New York, shkaktoi reagime të forta në publik rreth një muaj më parë. Falë ndihmës së dhënë nga biznesmeni shqiptaro-amerikan Elton Ilirjani, situata e saj është përmirësuar ndjeshëm. Aktualisht, këngëtarja po qëndron në një hotel në New York, shpenzimet e të cilit mbulohen nga Ilirjani.
