Moderatorja e njohur, Arbana Osmani, ka ndarë së fundmi detaje rreth përjetimeve të saj gjatë shtatzënisë së tretë, duke rrëfyer se nuk e kishte menduar të bëhej nënë përsëri aq shpejt. Pas dy djemve, Jonit dhe Diellit, ardhja e papritur e vajzës, Zoi, e gjeti mes angazhimeve të shumta profesionale dhe planeve personale.
Në programin “Mirëmbrëma yje,” ku kishte të ftuar aktoren Adriana Matoshi, Arbana tregoi për herë të parë se lajmi i shtatzënisë e kishte zënë në befasi:
“Do ta them një gjë që s’e kam thënë kurrë. Kur kam mbetur shtatzënë me Zoin, me vajzën time, me fëmijën e tretë, nuk isha gati për t’u bërë nënë, prapë, aq shpejt. Kisha dy çunat dhe Zoi ka ardhur surprizë. Isha në mes të punëve. Kisha shumë stres, kisha programuar dasmën, kisha programuar pushime, kisha kaluar ca vite të vështira që mezi thashë ‘më në fund, tani u qetësova, do kënaqem, do rri’ dhe… ngela shtatzënë.”
Arbana gjithashtu tregoi sesi një intervistë e Adrianës e kishte ndihmuar të shihte situatën me një perspektivë më pozitive. Duke folur për përballjen e saj me vështirësitë, tha:
“E pastaj, dole ti, në një intervistë që flisje për kancerin, me katër fëmijë, edhe me filma, edhe kishe kaluar edhe tumor. Thashë, ‘Arbana, mos u anko fare, mos fol fare, fare, as mos mendo fare, se shiko Adriana… Super grua.’”
