Prezantuesja e Ligës së Kampionëve, Eva Murati, është bërë kryefjalë e disa mediave ndërkombëtare, si Daily Mail, The Sun dhe GB News, për rrëfimin e saj mbi bullizmin në rrjetet sociale.
Murati, e cila nisi punën në ekran që në moshën 18-vjeçare në një televizion italo-shqiptar, është tashmë një figurë e njohur në sportin evropian. 29-vjeçarja ka qenë prezantuese e kompeticioneve elitare të futbollit për Vizion Plus dhe Tring TV që nga viti 2017.
Pavarësisht suksesit të saj profesional dhe një audience prej mbi një milion ndjekësish në*Instagram, ajo ka përjetuar sulme të shumta për pamjen e saj.
Së fundmi, Murati ndau një video në TikTok, ku iu kundërpërgjigj personave që e kanë gjykuar për paraqitjen e saj.
“Fillova të punoj në TV në moshën 17-vjeçare, u ngacmova nga urrejtësit në internet dhe mësova të vlerësoja veten”, shkroi ajo në postimin e saj.
“Je kaq e bukur, si mundet dikush të të bullizojë?”, ka qenë një nga reagimet më të shpeshta nga ndjekësit.
“Fatkeqësisht, ndryshe nga personazhet publikë meshkuj, femrat ngacmohen për gjëra të parëndësishme si mënyra e grimit, flokët, veshjet që kanë zgjedhur dhe gjëra të tjera që nuk kanë të bëjnë me punën e tyre profesionale”, ka shkruar Murati.
Reagimi i saj ka marrë mbështetje të madhe nga fansat dhe ka bërë jehonë në mediat ndërkombëtare, të cilat e kanë vlerësuar fuqinë e saj për të përballuar negativitetin online.
