Këngëtari i njohur Endri Prifti ka hapur zemrën për jetën e tij personale në një intervistë të dhënë në emisionin Living Room. Artisti foli për marrëdhënien me fëmijët e tij dhe dhimbjen që ndjen për shkak të mungesës së kontaktit me njërin prej tyre.
Gjatë bisedës, Prifti pranoi se fëmijët janë pika e tij më e dobët dhe se është përballur me një sfidë të madhe: që prej më shumë se dy vitesh, nuk e ka parë djalin e vogël. Ai e lidh këtë mungesë me situatën që ka pasuar ndarjen nga ish-bashkëshortja.
“Vdes për dy djemtë e mi, kam dy vjet pa e parë,” tha ai, duke shprehur mallin dhe dhimbjen e tij. Sipas këngëtarit, disa nga momentet më të bukura të jetës kanë qenë kur ka darkuar me të dy djemtë, por tani situata ka ndryshuar dhe ai nuk ka pasur mundësi ta takojë të voglin.
Ndërsa moderatorja e pyeti nëse ka pasur mundësi të gjejë një gjuhë të përbashkët me ish-bashkëshorten për të lehtësuar kontaktin me djalin, Prifti u përgjigj se ka zgjedhur të mos ushtrojë presion.
“Unë i lë të lirë gjërat vetë, të mendojë vetë kur do të vijë,” shpjegoi ai, duke shtuar se ndonëse situata është e vështirë, ai beson se lidhja prind-fëmijë është e pathyeshme.
Megjithatë, ai mbetet optimist se kjo periudhë do të kalojë dhe se djali do të rikthehet pranë tij. “Do të vijë se s’bën sepse gjaku s’bëhet ujë,” u shpreh ai me bindje.
Pavarësisht distancës, Endri Prifti theksoi se dashuria për fëmijët e tij mbetet e pandryshuar dhe madje e ka forcuar edhe më shumë.
“Të dy djemtë e mi janë pasioni im, janë jeta ime, janë forca ime,” tha ai, duke nënvizuar se, pavarësisht gjithçkaje, ai do të mbetet gjithmonë aty për ta.
