Tensionet me Rozanën u rikthyen menjëherë pas hyrjes së dytë të Eglit në shtëpinë e BBVA.
Gjithçka nisi kur Egli e akuzoi Rozanën se kishte qenë pikërisht ajo që e kishte sjellë e para në publik epitetin “posesive” përsa i përket sjelljes së Eglit ndaj Gjestit. Rozana e pranoi se ky ishte mendimi i saj, por se nuk ishte e vetmja që e mendonte. Përkundrazi, të gjithë, sipas saj, e kishin vënë re që Egli e ndiqte Gjestin nga pas qysh prej fillimit, madje dhe përgjigjej për të.
Situata u bë edhe më e nxehtë kur Rozana i drejtoi një pyetje Eglit: “Qenke mbushur shumë, çfarë ke parë jashtë?”
Egli e pranoi se rikthimi i saj në shtëpi e kishte gjetur më të fortë dhe më të vetëdijshme për lojën, ndërsa Rozana nuk hezitoi të shtonte: “Po nuk ke ikur e s’je mbushur prej meje, se nuk ta kam bërë unë të keqen.”
Kulmi i debatit arriti kur Rozana e akuzoi Eglin se ishte rikthyer enkas për të:
“Ti qenke kthyer për mua. Paske parë Big-un shumë mirë dhe paske ardhur për Rozin. Hajde për veten tënde! Tani je bërë Egli që kam dashur që në fillim.”
Megjithatë, Egli e mohoi këtë, duke këmbëngulur se qëndrimi i saj i ri nuk kishte të bënte me Rozanën, por me forcimin e saj personal.
