Në një botë ku imazhi ka rëndësi të madhe, Robert Berisha nuk e sheh të nevojshme ta fshehë faktin se ka eksperimentuar me ndërhyrjet estetike. I ftuar në emisionin “Weekend”, këngëtari tregoi se botox-i nuk është më tabu për meshkujt dhe se ai vetë është ndër të parët që e ka provuar.
“Nuk kam pritur të dashurën për të bërë botox,” u shpreh ai me humor, duke shtuar se vazhdon ende me trajtime të tilla. “Dikur, meshkujt as që e mendonin, tani e gjithë shoqëria ime shkon. Para 5-6 vitesh, kur e pashë veten, mendova: a është më mirë ta lë fytyrën me ‘gërricje’ apo ta lustroj? Pse të mbaj pesë vija në ballë?”
Ndërkohë, Roberti është i bindur se zgjedhjet estetike duhet të mbeten personale dhe nuk duhet të jenë rezultat i presionit nga partneri. “Nëse një burrë e kërkon dhe ajo e respekton atë burrë, ndoshta e bën. Edhe unë do ta bëja për partneren time. Por unë s’do ta kërkoja, sepse nëse nuk e ka qejf vetë, s’ka kuptim.”
Sidoqoftë, ka një gjë për të cilën ai do të këshillonte partneren: të mbajë peshën nën kontroll, por jo për estetikë, për shëndetin. “Nuk është vështirë t’i thuash një njeriu që e do: bëje për veten tënde.”
