Në familjen Beckham, duket se jo çdo gjë po ecën vaj. Tensioni është rritur ndjeshëm mes dy djemve të David dhe Victoria Beckham, Brooklyn dhe Romeo, për shkak të një historie dashurie që po shkakton përçarje në marrëdhëniet familjare.
Burime pranë familjes kanë bërë të ditur për TMZ se kBrooklyn dhe Romeo nuk kanë më komunikim, dhe arsyeja është një emër i njohur për të dy: Kim Turnbull.
“Familja është gjithçka,” shkroi Romeo së fundmi në një postim nga një festë, por mungesa e etiketimit të vëllait dhe kunatës së tij nuk kaloi pa u vënë re.
Kim, me të cilën Brooklyn kishte qenë në një lidhje disa vite më parë, është aktualisht në një marrëdhënie me Romeon. Edhe pse historia me Brooklyn tashmë është e kaluar — ai është i martuar me Nicola Peltz — duket se nuk është aq e thjeshtë ta lësh pas.
Sipas burimeve, problemi nuk është se Brooklyn është xheloz për lidhjen e re të Romeos, por për motivet që fshihen pas saj. “Çështja qëndron nëse vajza në fjalë është lidhur me Romeo për motivet e duhura,” shprehen ata.
Përplasja mes tyre ka pasur pasoja të drejtpërdrejta. Brooklyn dhe Nicola nuk morën pjesë në festën e 50-vjetorit të David Beckham, ndërkohë që Romeo ishte i pranishëm bashkë me Kim. Po ashtu, ata munguan edhe në sfilatën e Victoria Beckham — sërish për shkak të pranisë së saj.
Drama mes vëllezërve, sipas raportimeve, ka nisur që në dhjetor dhe prej atëherë është thelluar gjithnjë e më shumë.
Nga ana tjetër, David dhe Victoria duket se nuk kanë rezerva për lidhjen e Romeos me Kim. “Ata nuk e kanë problem që ajo po del me djalin e tyre,” thonë burimet. Mosmarrëveshja mbetet e kufizuar vetëm mes vëllezërve, me Brooklyn që nuk e miraton lidhjen, por pa pasur ndonjë konflikt të drejtpërdrejtë me Romeon.
Në dukje një histori dashurie e zakonshme, por në prapaskenë, ajo ka ndezur një krisje të thellë në një prej familjeve më të famshme të botës.
