Pas një pauze në ekran, Sara Gjordeni është gati të rikthehet me një ide të re televizive, që sjell emocione të veçanta për nënat e ardhshme. E ftuar në emisionin “Ftesë në 5”, ajo ndau me publikun detaje nga projekti, por edhe nga jeta e saj personale.
Formati i ri do të fokusohet në një moment të veçantë për çdo prind të ardhshëm: zbulimin e gjinisë së bebit. “Një format ndryshe, që synon të sjellë ndjeshmëri dhe gëzim në ekran,” tha Sara, duke theksuar rëndësinë e këtyre çasteve për familjet.
Në intervistë, ajo foli edhe për marrëdhënien me partnerin e saj, Bardhin, dhe vendimin për të lidhur kurorë. “Martesa me Bardhin ishte një dëshirë e tij që unë vendosa ta plotësoja me zemër,” rrëfeu ajo me sinqeritet. Sara theksoi gjithashtu mirëkuptimin dhe tolerancën në çift, duke shtuar: “Të dy jemi të hapur dhe tolerantë ndaj besimeve të njëri-tjetrit, nuk jemi ekstremistë.”
Në fund, me shumë emocion, Sara foli për vajzën e saj të vogël, Nea. “Ajo është kopja ime e vogël,” tha ajo me dashuri, duke shtuar se dëshiron t’i ofrojë të bijës gjithçka që vetë nuk ka pasur mundësinë të përjetojë gjatë fëmijërisë.
