Për ata që menduan se gjithçka ishte lënë pas, Labinot Gashi ka rikthyer në skenë një nga debatet më të përfolura të showbiz-it shqiptar: raportin e tij të tensionuar me këngëtaren Dafina Zeqiri. Në një intervistë të fundit për “RTV Dukagjini”, moderatori shpalosi edhe një herë ndjesitë dhe zhgënjimin ndaj artistes, me të cilën dikur ndante miqësi të ngushtë.
“Nuk kemi asnjë raport, nuk flasim, nuk jemi as follow në Instagram”, u shpreh Labinoti, duke theksuar distancën e plotë mes tyre.
Ai përmendi faktin se ka qenë i pranishëm në jetën e saj për një kohë të gjatë, dhe ka ndarë shumë me të — qoftë në tavolinë, qoftë në përkrahje emocionale. Megjithatë, sipas tij, gjithçka ndryshoi për një arsye që e quan të vogël, por domethënëse: mungesa e një ftese për ditëlindjen e saj.
“Unë kam bërë shumë për të. Kam ngrënë bukë me të, i kam qëndruar pranë për vite, por një gjë e vogël i ka lënë përshtypje. E quajta “mosmirënjohëse”, për ditëlindjen që organizoi. Si është e mundur që një njeri që i ka qëndruar afër për dekada, të mos jetë pjesë e asaj dite, ndërsa ishin aty njerëz që s’kanë qenë kurrë afër saj? Njerëz që ishin në “Big Brother”,” tha ai.
Pavarësisht zhgënjimit, Labinoti nuk la pa shprehur një urim të ngrohtë për Dafinën, e cila është në pritje të fëmijës së saj të parë.
“Dua t’i uroj më të mirat, pasi po bëhet nënë. Më e rëndësishmja është të mos stresohet. Mbi të gjitha, është respekti”, shtoi moderatori.
Ky nuk është hera e parë që ai shprehet publikisht për këtë temë. Në prill të vitit 2023, në një intervistë për “Prive”, Labinoti zbuloi se një postim i tij në Instagram që aludonte për “mosmirënjohje” nuk ishte rastësi.
“Nuk ishte rastësi, por nuk ishte vetëm për të [Dafinën], por për të gjithë njerëzit e tjerë. Në fakt, këtu po e them për herë të parë, [postimi] nuk ishte vetëm sepse në festë nuk ishte Labi, por nuk pashë shumë njerëz që ishin në fillimet e hershme të Dafinës,” tha ai, duke përmendur kohën kur artistët vareshin më shumë nga televizionet për promovim sesa nga rrjetet sociale.
“Po e flas haptazi për shkak se as unë nuk i harroj njerëzit që në fillimet e mia të karrierës më kanë përkrahur,” përfundoi ai.
