Në episodin e fundit të emisionit “Inspire”, moderatorja e njohur Alketa Vejsiu prezantoi kandidaturën e Julinda Dhamës për deputete të PS-së në Tiranë, duke ndarë një sërë vlerësimesh për kontributin e saj në shoqëri dhe politikë. Në një bisedë të ngrohtë dhe motivuese, Alketa theksoi:
“Ti me gjithë pasionin dhe punën tënde të gjithë këtyre viteve ke sjellë një copëz qytetërim në këtë vend dhe meriton të kesh një zë në parlament.”
Por momenti më emocional i intervistës erdhi kur Julinda Dhame u surprizua nga një mesazh i të birit, Geri. Në një deklaratë të ndjerë që nxori emocionet në sipërfaqe, ai tha:
“Më ka dedikuar gjithë jetën dhe unë nuk kam fjalë se si ta falenderoj, nuk kam fjalë.”
Mes lotësh, Dhame ndau se për të, përfshirja në politikë është një hap i natyrshëm pas viteve të angazhimit në komunitet, veçanërisht në mbështetje të të rinjve, artistëve dhe sportistëve.
Alketa shtoi më tej se e njeh Julindën si një grua me guxim dhe vizion:
“Ti je gati të konkurrosh… të njoh si Julindën e makinave të mëdha që shkonin në terrenet më të paurbanizuara për të na treguar një copëz tjetër Shqipërie. Të njoh si Julindën që ka dhënë kontribut në Bashkinë e Tiranës për 10 vite… Je ndryshe, je e guximshme, je një vajzë shumë liberale, je një qytetare evropiane, e botës madje jo vetëm e Evropës.”
E përkushtuar ndaj çështjeve sociale dhe me një karrierë që e ka vendosur pranë komunitetit, Dhame synon që zëri i saj në Parlament të jetë përfaqësues i energjisë dhe vlerave që ajo përfaqëson.
