Cassie, e cila është tetë muaj e dy javë shtatzënë, po jep dëshminë e saj në gjyqin kundër ish-partnerit të saj Sean “P. Diddy” Combs, i akuzuar për përdhunim, prostitucion dhe shantazh. Megjithatë, prokurorët dyshojnë se ekipi i mbrojtjes së Diddy-t po përdor taktika për të zvarritur dëshminë e saj me qëllim që ajo të lindë para se të përfundojë procesi i marrjes në pyetje.
Kjo strategji mund të ketë pasoja të mëdha për çështjen, pasi lindja e Cassie-t mund të shkaktojë ndërprerje në dëshmi, duke çuar ndoshta edhe në shpalljen e gjyqit “të pavlefshëm”. Cassie është një nga dëshmitaret kryesore në këtë rast.
Prokurorët kanë kërkuar që dëshmia e saj të përshpejtohet dhe të përfundojë brenda javës, duke theksuar se ajo tashmë ka dëshmuar për katër ditë radhazi me orare të gjata. Ata akuzojnë mbrojtjen se po e shfrytëzon këtë kohë për të fituar avantazh.
Në një letër drejtuar gjykatësit Arun Subramanian, prokurorët paralajmërojnë se “nëse Cassie lind dhe kthehet më pas për të dëshmuar sërish, mbrojtja do të ketë më shumë kohë për të përgatitur pyetje të reja, që mund ta ndryshojnë drejtimin e gjyqit”.
Cassie ka rrëfyer për abuzime të shumta gjatë lidhjes 11-vjeçare me P. Diddy-n, duke përfshirë pjesëmarrjen në “freak-offs” — festa që sipas saj përfshinin seks dhe përdorim të drogërave të rënda si kokaina, ketamina dhe GHB, e njohur edhe si droga e përdhunimit.
