Në një rrëfim prekës në podcastin e aktivistit Matt Bernstein, Vivian Jenna Wilson – vajza transgjinore e Elon Musk – ka folur hapur për ndarjen emocionale dhe personale nga babai i saj. Vivian, e cila prej vitit 2020 është deklaruar publikisht si grua trans, tregon një moment të dhimbshëm që për të përfaqëson pikën e kthesës.
Sipas saj, Elon Musk e ka përmendur me emrin e saj të mëparshëm dhe ka deklaruar se “djali im është i vdekur, i vrarë nga virusi i zgjuar.” Për Vivian, kjo nuk ishte thjesht një frazë, por një akt publik mohimi dhe përçmimi.
“Jordan Peterson i tha ‘më vjen keq për humbjen (vdekjen) e djalit’, dhe unë isha në një dhomë të vogël në Tokio, duke ndjekur universitetin, dhe thashë me vete: ‘Po përpiqet të më godasë publikisht?’ Por jo, nuk do ta lejoja ta bënte këtë,” rrëfen ajo me një ton të hidhur dhe sfidues.
Reagimi i saj nuk vonoi. Në Threads, Vivian postoi një koment që bëri xhiron e rrjeteve: “Duket shumë mirë për një k*rvë të vdekur,” – një përgjigje e drejtpërdrejtë ndaj asaj që ajo e quan fshirje të identitetit të saj nga ana e të atit.
Pas publikimit të intervistës, Vivian tha se u konsultua menjëherë me nënën e saj, Justine Wilson, e cila e inkurajoi që të mos e mbante brenda vetes dhimbjen: “Nuk mund të lejoj që kjo gjë të më rrëzojë. Duhet të luftoj,” kujton ajo, ndërsa nënvizoi këshillën e nënës: “Bëj atë që mendon se është e drejtë. Vetëm kujdesu për veten.”
Në të njëjtin episod të podcastit, Vivian nuk nguroi të shprehte opinionin e saj për figurën publike të Muskut, duke e përshkruar atë si “mashtrues” dhe “të dëshpëruar për vëmendje”.
Sipas saj, marrëdhënia me të atin është ndërprerë plotësisht që nga viti 2020. “Jam totalisht e shkëputur nga ai – emocionalisht dhe financiarisht,” tha ajo.
