Aktorja dhe ish-kandidatja për deputete, Julia Ilirjani, u shfaq së fundmi në emisionin “Ftesë në 5”, duke bërë daljen e saj të parë publike pas zgjedhjeve të këtij viti, ku ajo garoi në listat e Partisë Demokratike, por siguroi vetëm 384 vota.
Në intervistë, Julia foli hapur për gjithë rrugëtimin e saj politik dhe falënderoi votuesit që i dhanë mbështetje. Por momenti më i ndjeshëm i bisedës ishte kur ajo u përlot teksa kujtoi një periudhë të vështirë nga jeta në Amerikë, kur punonte si pastruese.
“I thashë Renees bobo ngelëm pa punë, s’kemi ku hamë”, rrëfeu Julia, duke përshkruar një situatë të rëndë ekonomike që përjetoi me vajzën e saj. Më tej, tregimi i saj preku edhe më shumë zemrat e publikut kur ajo shtoi: “Mos u mërzit se unë ha në drekë në shkollë dhe gjysmën e ushqimit do të ta sjell ty”, kishte thënë vajza e saj.
Publiku shqiptar e njeh më së shumti Julia Ilirjanin për pjesëmarrjen në Big Brother VIP Albania 3, ku mori vëmendje të madhe, megjithëse nuk e fitoi garën – çmimi iu dha aktores Egla Ceno.
Pas angazhimit të saj në politikë, Julia nuk ka hequr dorë nga arti dhe vazhdon të angazhohet në projekte të teatrit dhe filmit.
