Supermodelet Gigi dhe Bella Hadid kanë zbuluar një kapitull të ri dhe të papritur në jetën e tyre familjare: ato kanë një motër nga babai, 23-vjeçaren Aydan Nix. Në një rrëfim për Daily Mail, motrat treguan se Aydan është fryt i një romance të shkurtër të babait të tyre, Mohamed Hadid, me Terri Hatfield Dull – lidhje që ndodhi pas ndarjes së tij nga Yolanda Hadid në vitin 2001.
Aydan është rritur në Florida dhe për shumë vite nuk e dinte të vërtetën për origjinën e saj. Vetëm pas vdekjes së burrit që e kishte rritur si vajzë të tij, ajo bëri një test gjenetik, i cili zbardhi lidhjen e saj biologjike me familjen Hadid.
“Që nga momenti që u njohëm në fund të 2023-shit, e kemi përqafuar me dashuri dhe kemi kaluar kohë së bashku si familje. Si motra, ne kemi bërë biseda shumë të hapura dhe të përzemërta, bashkë me Aydan, sesi ta mbështesim dhe mbrojmë”, u shprehën Gigi dhe Bella.
Të dyja motrat theksuan se Aydan dhe familja e saj preferojnë të qëndrojnë larg vëmendjes së medias dhe kërkuan respekt për privatësinë e saj, ndërsa ajo jeton një jetë të thjeshtë si vajzë e re në New York.
Sipas Daily Mail, lidhja e Mohamed me nënën e Aydan përfundoi para se ai të mësonte se ajo ishte shtatzënë. Megjithatë, burimet tregojnë se ai ka qenë gjithmonë i sjellshëm dhe i afërt me vajzën, edhe pse nuk e ka ndihmuar financiarisht.
Ky zbulim i papritur ka sjellë jo vetëm një histori të re për opinionin publik, por edhe një bashkim emocional mes tri motrash që po mësojnë të ndërtojnë një lidhje të re mbi bazën e të vërtetës dhe mbështetjes reciproke.
