Pas një periudhe të shkurtër heshtjeje në rrjetet sociale, këngëtarja Egli Tako ka vendosur të reagojë publikisht për herë të parë pas zhdukjes së dy bashkëpunimeve të saj me Fifin nga platforma YouTube. Këngët “Shuj Shuj” dhe “Ku je nis” janë larguar nga kanali, duke nxitur shumë reagime dhe spekulime nga publiku.
Në një reagim të gjatë dhe të përmbajtur, Egli shpjegon pozicionin e saj, duke theksuar se nuk ka pasur kurrfarë ndikimi në marrjen e këtij vendimi. Ajo sqaron se roli i saj në këto projekte ishte i kufizuar:
“Kënga është hequr për 2 ditë nga platforma YouTube, në vendim të autores për shkaqe të sajat, ndaj edhe nuk kam bërë asnjë ndërhyrje apo reagim, pasi nuk janë materiale të miat”, thekson Egli.
Duke ruajtur një ton të qetë dhe diplomatik, Egli thekson se fshirja dhe rikthimi i këngëve nuk kanë qenë në dorën e saj, por njëkohësisht i shpreh mirënjohje publikut për mbështetjen që ka marrë. Ajo lë të kuptohet se, për aq sa ka mundësi, është pro rikthimit të këngëve, për shkak të dashurisë së fansave.
Në fund të reagimit të saj vjen dhe konfirmimi i asaj që shumëkush e kishte dyshuar – ndarja nga Fifi nuk është vetëm një çështje teknike, por një shkëputje e mirëfilltë në planin profesional:
“Kam vendosur me shumë respekt reciprok me Fifin, të shohim në një spekter më të gjerë, në mënyrë që asnjëra palë të mos ndikojë tek tjetra, për sa kohë të dyja i përkasim të njëjtës fushë, këndimit.”
Këngëtarja e mbyll mesazhin e saj me një premtim për projekte të reja që do të publikohen gjatë këtij muaji, duke falënderuar publikun për dashurinë dhe përkrahjen e vazhdueshme.
Ndërkohë që zhvillimet mbeten në pritje, është e qartë që Egli ka zgjedhur ta trajtojë situatën me maturi. Tani, të gjithë sytë janë nga Fifi – do të zgjedhë të përgjigjet apo të heshtë?
