Modelja dhe moderatorja argjentinase Belen Rodriguez, një nga figurat më të komentuara të medias italiane, ka folur hapur për jetën e saj private në një intervistë të fundit për revistën ‘Chi’. Ndonëse zakonisht në qendër të vëmendjes për lidhjet e saj romantike, këtë herë ajo zgjodhi të flasë për një kapitull ndryshe – beqarinë.
“Është hera e parë që jam beqare për kaq kohë, që nga shtatori. Beqare dhe e dëlirë. Nuk më pëlqen kjo gjë e të shkuarit nga një shtrat në tjetrin, më duket e ndyrë. Gjithmonë kam qenë në një lidhje,” u shpreh Belen me një sinqeritet të rrallë.
Rodriguez thekson se kjo periudhë larg marrëdhënieve e ka ndihmuar të reflektojë mbi veten dhe të kuptojë çfarë kërkon me të vërtetë nga një partner.
“Mashkulli im ideal? Një burrë që nuk është egoist, inteligjent, i përmbushur, por edhe i ndjeshëm, me një anë femërore. Por kjo nuk ka të bëjë me feminizmin, për mua, burrat veshin pantallona dhe gratë duhet të mbrohen. Burrat kanë muskuj, por edhe brishtësi. Është mirë të shohësh këtë anë të tyre, sepse të bën të ndihesh i barabartë,” shpjegon ajo.
Duke folur pa komplekse, Belen shfaqet si një grua që ka vendosur të mos ndjekë më klishetë romantike, por të jetojë me vetëdije dhe standarde të reja.
