Pas komenteve të Aulona Mustës, e cila u shpreh se nuk e kuptonte se si një person që “nuk di të flasë shqip siç duhet” mund të drejtonte një emision pasditeje, nuk ka vonuar reagimi i Beniada Nishanit.
Në një postim në Instagram, Beniada është shprehur me tone të qarta, por pa e përmendur drejtpërdrejt emrin e Aulonës:
“Gjithmonë në jetën tonë do të ketë njerëz që kanë diçka për të thënë – për mënyrën si vishemi, si flasim, si ecim. Bota nuk është perfekte, dhe as ne nuk jemi. Ajo që ka rëndësi është të shikosh rrugën tënde. Ka gjithmonë kohë për t’u përmirësuar, por sa më përket mua, unë preferoj ironinë mbi ligësinë.”
Më tej, modelja dhe prezantuesja thekson se në jetën e saj nuk ka vend për urrejtje dhe energji negative:
“Askush nuk mund të të heqë fatin tënd. Shqipëria është e vogël, por ka vend për të gjithë.”
Në fund të reagimit të saj, Beniada shton me një nuancë ironie:
“Edhe po, është normale të sulmohesh… kur tjetra të fton dy herë dhe ti s’shkon për një intervistë, çfarë pret? Të paktën, herë pas here, bëj zgjedhjet e duhura. :)”
Ky postim është parë si një përgjigje e drejtpërdrejtë ndaj deklaratës së Aulonës, duke treguar se Beniada preferon të ruajë elegancën edhe kur ndodhet në qendër të kritikave.
Pas reagimit të saj, Aulona ndau një klip nga intervista duke e cilësuar komentin e saj si një opinion profesional.
“Pra ku ishte e shara këtu? Ku ishte mosmbështetja e gruas? Ofendimi? Denigrimi? Tre gra me 20 vite eksperiencë në media, që i kanë provuar të gjitha llojet e medias, nga e shkruara, kur dilje me diktofon në dorë, tek radio, televizioni, online, etj, po thonë opinionet e tyre për një temë që i shqetëson. Opinione të bazuara mbi fakte!
Xhelozi? Seriozisht dmth? Ashtu siç nuk kam frikë të them çfarë s’më duket e drejtë, ashtu nuk kam frikë të them publikisht edhe kush mendoj që profesionalisht vlen më shumë se mua! Kush e ka parë intervistën e di këtë. Kush nuk e ka parë, ja ku e ka, tre minuta janë.” ka thënë ajo.
