Yolanda Hadid, ish-ylli i “Real Housewives of Beverly Hills”, është përballur me kritika në rrjet pas publikimit të një fotoje të mbesës së saj, Khai, vajza e Gigi Hadid dhe Zayn Malik.
Një nga komentuesit në Instagram e cilësoi postimin si “të papërshtatshëm”, duke shkruar:
“Privatësia e një fëmije duhet të respektohet gjithmonë. Të postosh një foto të tillë nuk është në rregull. Të lutem, mendo si mund ta ndikojë kjo në të ardhmen.”
Por Yolanda, 61 vjeçe, nuk e la pa përgjigje dhe reagimi i saj ishte i ashpër:
“Të lutem shko ngacmo dikë tjetër. Nuk je i mirëpritur këtu!!!”
Fotoja që shkaktoi debatin ishte pjesë e një postimi të ditëlindjes për djalin e saj Anwar Hadid, ku ai shfaqej duke luajtur në plazh me mbesën e tij. Në imazh, Khai shfaqej me kostum banje të kuq, me fytyrën të kthyer nga kamera. Në disa foto të tjera nga i njëjti postim, Khai dhe xhaxhai i saj shiheshin duke ndjekur një rodeo.
Ndërkohë që shumë fansa të Yolandës e mbrojtën postimin, duke komentuar:
“Ka bekimin e vajzës së saj dhe as nuk po e tregon fytyrën e mbesës,” të tjerë shprehën shqetësim për pasojat që mund të ketë një postim i tillë, duke theksuar që ajo ka një numër të madh ndjekësish dhe rrjetet sociale janë plot me njerëz të dyshimtë.
Khai lindi në vitin 2020 dhe që nga ajo kohë, Gigi dhe Zayn janë përpjekur ta mbajnë jetën e saj private larg syve të publikut. Në një letër të hapur më 2021, modelja shpjegoi se dëshira e tyre është që Khai të ketë një fëmijëri sa më normale:
“Dëshira jonë është që ajo të zgjedhë vetë si të ndajë veten me botën, kur të rritet.”
Gigi Hadid, e cila aktualisht është në një lidhje me aktorin Bradley Cooper, ndan herë pas here momente të ëmbla me Khain – nga ditëlindje e deri te pushime verore – por gjithmonë duke e mbajtur identitetin e saj të mbrojtur. 
