Në një rrëfim prekës gjatë emisionit “Mam” me Orinda Hutën, aktorja dhe moderatorja Delinda Disha ndau një nga përjetimet më të dhimbshme të jetës së saj — humbjen e binjakëve që priste me aq dashuri.
Gjatë intervistës, Delinda foli me ndjeshmëri për përvojën e të qenit nënë dhe karakteret e ndryshme të djemve të saj: “Dasantini është më serioz dhe i thellë, ndërsa Kostandini, i vogli i shtëpisë, është i qeshur dhe plot energji.”
Duke kujtuar momentin kur mësoi se ishte shtatzënë me binjakë, ajo tha me emocion:
“Kur mendon për një fëmijë tjetër dhe papritur merr vesh që janë dy, nuk ka lumturi më të madhe.”
Por gëzimi i madh u kthye shpejt në trishtim. Gjatë muajit të katërt të shtatzënisë, një kontroll rutinë zbuloi një komplikacion të rëndë. Mjekja i komunikoi lajmin e dhimbshëm: njëri nga bebet nuk kishte më rrahje zemre. Shpresa për të shpëtuar binjakun tjetër vazhdoi për pak kohë, por fatkeqësisht edhe ai humbi jetën.
Delinda, me lot në sy, tregoi se si i kishte shpjeguar djalit të madh lajmin tragjik për humbjen e motrës dhe vëllait që ai kishte ëndërruar.
“Dasantini më tha: ‘Pse nuk ma the më parë? Unë e kuptoj’. Ishte një moment i vështirë, por e kuptova që gjithçka ndodh për një arsye. Ndoshta për të na bërë më të fortë,” rrëfeu ajo.
